Moliyaviy savodxonlikni oshirishga oid tashabbusimiz doirasida Laboratoriya Sirdaryo, Farg‘ona va Toshkent viloyatlarida moliyaviy savodxonlikning qishloq aholisi hayotiga ko‘p qirrali ta’sirini o‘rganishga qaratilgan kompleks tadqiqot olib bormoqda. Tadqiqot birlamchi ma’lumotlarga asoslangan bo‘lib, uy xo‘jaliklari bilan o‘tkazilgan strukturaviy so‘rovnomalar orqali moliyaviy xabardorlik darajasi jamg‘arish, qarz majburiyatlari va pensiya rejalashtirish kabi asosiy xatti-harakatlarga qanday ta’sir qilishini tahlil qiladi.

Tadqiqotda moliyaviy barqarorlik va uy xo‘jaliklarining moliyaviy zaifligi, ortiqcha qarzga botish muammolari, fintex echimlaridan foydalanish imkoniyati va umumiy moliyaviy inklyuziya masalalariga alohida e’tibor qaratiladi.

Loyiha maqsadi – qishloq hamjamiyatlarining moliyaviy imkoniyatlarini kengaytirishga xizmat qiluvchi samarali siyosat va dasturlar ishlab chiqish uchun ma’lumotlarga tayanilgan, asosli tavsiyalarni taqdim etishdir.

Tadqiqot natijalari qishloq hududlaridagi iqtisodiy barqarorlik va moliyaviy farovonlikni oshirishga qaratilgan milliy va mintaqaviy strategiyalar uchun asos bo‘lib xizmat qilishi kutilmoqda.